ရဟန်းမင်းကြီးဖရန်စစ်အရှင်သူမြတ်သည် လွန်ခဲ့သော (၁၀) နှစ်က အယ်လ်ကေးဒါးမှဖျက်ဆီးခဲ့သည့်
ကာသီဒြယ်ဘုရားကျောင်းသို့ ကြွရောက်လည်ပတ်ခဲ့သည်
ရဟန်းမင်းကြီးဖရန်စစ်အရှင်သူမြတ်သည် လွန်ခဲ့သောဆယ်နှစ်က အယ်လ်ကေးဒါးမှတိုက်ခိုက်ခဲ့သည့် ဘဂ္ဂဒက်မြို့ရှိ “ကယ်တင်ခြင်း၏သခင်မ” အမည်ရှိသော ဆီရို-ကက်သလစ်ဘုရားကျောင်းတော်သို့ အလည်အပတ်ကြွရောက်ကာ ဆရာတော်ကြီးများ၊ ရဟန်းလောင်းများ၊ သစ္စာသုံးပါးခံ အမျိုးသား/အမျိုးသမီး သူတော်စင်များနှင့် တွေ့ဆုံခဲ့သည်။
ရဟန်းမင်းကြီးက ထိုတိုက်ခိုက်မှုဖြစ်စဉ်တွင်အသက်ပေးခဲ့ကြသည့် အာဇာနည် (၄၈) ဦးတို့၏ ယုံကြည်ခြင်းသက်သေခံခဲ့ကြပုံကို အမှတ်ရအောက်မေ့လျက်၊ ၎င်းတို့ကို သူတော်မြတ်အဖြစ် တင်မြှောက်ရန်ပြင်ဆင်နေဆဲဖြစ်ကြောင်း မိန့်မြွက်ကာ၊ ၎င်းဖြစ်စဉ်အတွင်း သေဆုံးသွားခဲ့ကြသော မွတ်ဆလင် (၉) ဦးကိုလည်း သတိရဆုတောင်းပေးခဲ့သည်။
ရဟန်းမင်းကြီး - “သူတို့ရဲ့သေဆုံးမှုတွေက စစ်ပွဲတွေ၊ မုန်းတီးမှုတွေ၊ အကြမ်းဖက်မှုတွေနဲ့ သွေးသွန်းမှုတွေကိုလှုံ့ဆော်ခြင်းဟာ စစ်မှန်တဲ့ဘာသာရေးသွန်သင်ချက်တွေနဲ့ကိုက်ညီမှုမရှိကြောင်း ပြင်းထန်တဲ့သတိပေးချက်တစ်ခုဖြစ်တယ်။ ဘယ်ဘာသာကိုယုံကြည်ကိုးကွယ်သူပဲဖြစ်နေပါစေ၊ အကြမ်းဖက်မှုနဲ့ ညှင်းပန်းနှိပ်စက်မှုခံရသူအားလုံးကို အမှတ်ရစေချင်ပါတယ်”
ရဟန်းမင်းကြီးက အီရတ်ဘာသာဝင်များသည် ဆင်းရဲခက်ခဲမှုများကို နေ့စဉ် ကြုံတွေ့နေကြရကြောင်းနှင့်၊ ပြည်သူလူထုနှင့်နီးကပ်စွာရှိနေခြင်းအတွက် အီရတ်ကက်သလစ် သာသနာတော်အား ကျေးဇူးတင်ကြောင်းကိုလည်း ပြောကြားခဲ့သည်။
ရဟန်းမင်းကြီး - “သင်တို့နဲ့၊ သင်တို့ရဲ့နိုင်ငံသားတွေဟာ စစ်ပွဲနဲ့ ညှဉ်းပန်းနှိပ်စက်မှုတွေရဲ့ ဆိုးကျိုးတွေအဖြစ် အခြေခံအဆောက်အအုံတွေရဲ့ကျိုးပဲ့ပျက်စီးမှုတွေ၊ စီးပွားရေးနဲ့ ပုဂ္ဂိုလ်ရေးလုံခြုံမှုအတွက် ဆက်လက်ရုန်းကန်နေရတာကို ဖြစ်ပေါ်စေခဲ့ပြီး၊ ခရစ်ယာန်တွေအပါအဝင် လူတွေအများကြီးက ပြည်တွင်းမှာရော ကမ္ဘာကြီးရဲ့အခြားအစိတ်အပိုင်းတွေဆီ ရွှေ့ပြောင်းသွားခြင်းကို မကြာခဏဦးတည်နေတယ်”
ကော်ဇောကိုဥပမာအဖြစ်သုံး၍ အီရတ်တွင်ရှိသော ကွဲပြားခြားနားသည့်သာသနာတော်များ၏ ရှေးဟောင်း သမိုင်းဆိုင်ရာ၊ ဝတ်ပြုကိုးကွယ်ခြင်းဆိုင်ရာနှင့် ဝိညာဉ်ရေးဆိုင်ရာ အမွေအနှစ်များ အကြောင်းကို ပြောကြားခဲ့သည်။ ၎င်းမှာ ဘုရားသခင်ကိုယ်တော်တိုင် ဖန်ဆင်းရှင်အရင်းအမြစ်ဖြစ်ကြောင်းကိုညွှန်ပြသည့် တင်စားမှုပင်ဖြစ်သည်။
ရဟန်းမင်းကြီးက အာဗြာဟံ၏မြေပေါ်တွင် အားသစ်မာန်သစ်နိုးကြွလာရန်နှင့် အသစ်တစ်ဖန် ပြန်လည်မွေးဖွားရန်အတွက် နိုင်ငံတော်၏ မျှော်လင့်ချက်မှာ လူငယ်များပင်ဖြစ်သည်ဟု ပြောကြားခဲ့သည်။
ရဟန်းမင်းကြီး- “သူတို့ဟာ ငယ်ရွယ်ပေမဲ့ ဒီနှစ်တွေအတွင်းဖြစ်ပွားခဲ့တဲ့ပဋိပက္ခတွေက သူတို့ရဲ့စိတ်ရှည်မှုကို အပြင်းအထန်စမ်းသပ်ပြီးသားပါ။ ဒါပေမဲ့ သက်ကြီးဝါကြီးတွေနဲ့အတူ သူတို့ဟာ ဒီတိုင်းပြည်မှာ စိန်ဖူးလေးတွေဖြစ်ပြီး၊ သစ်တစ်ပင်ရဲ့ကြွယ်ဝတဲ့အသီးအပွင့်တွေဖြစ်တယ်ဆိုတာကို ဘယ်တော့မှမမေ့ပါနဲ့”
အစည်းအဝေးအပြီးတွင် ရဟန်းမင်းကြီးသည် Qaraqosh အမျိုးသမီးများရက်လုပ်ပေးသည့် ‘စတိုးလ်’ (stole - ရဟန်းအသုံးအဆောင်) ကို ပခုံးပေါ်တွင်တင်၍ “ကောင်းကင်ဘုံ၌…” မေတ္တာကို ထိုနေရာ၌ရှိနေသူများနှင့် အတူတကွ ရွတ်ဆိုဆုတောင်းခဲ့သည်။ နှိပ်စက်ညှဉ်းပန်းခံရသောခရစ်ယာန်များအတွက် မျှော်လင့်ချက်ကိုပေးသည့် အပြုအမူများပင်ဖြစ်သည်။ ရဟန်းမင်းကြီး၏ခရီးစဉ်အပြီးတွင်မူ အီရတ်နိုင်ငံသည် ယခင်နှင့်မတူတော့ဘဲ ပြောင်းလဲလိမ့်မည်ဟု မျှော်လင့်မိပါသည်။
ဘာဘီလွန်ဆရာတော်ကြီး Louis RapphaI SAKO မှ “ရဟန်းမင်းကြီးရဲ့ခရီးစဉ်မတိုင်ခင်ကတည်းက အပြောင်းအလဲကြီးရှိခဲ့တယ်။ ခရစ်ယာန်တွေ၊ မွတ်စလင်မ်တွေ၊ လူတိုင်းက ငြိမ်းချမ်းရေးနဲ့ သဟဇာတဖြစ်တည်မှုအကြောင်းတွေကို ပြောနေကြတာ။ ပြီးတော့ တင်းကျပ်တဲ့ဘာသာရေးအခြေခံဝါဒနဲ့ အကြမ်းဖက်မှုကို တိုက်ဖျက်ရေးအကြောင်းတွေလည်း ပြောကြတယ်။ ဒါက အင်မတန်မှ အပြုသဘောဆောင်တဲ့လက္ခဏာပါ” ဟု အင်တာဗျူးတစ်ခုတွင် ဖြေကြားခဲ့သည်။
Source: Romereports
2021-03-21 22:56:18
NEWS AND EVENTS
